भारतीय वंशाच्या म्हशींनी तीन बक्षिसे पटकावली

-महावीर सांगलीकर

बफेलो (अमेरिका): येथे झालेल्या मारक्या म्हशींच्या आंतरराष्ट्रीय स्पर्धेत भारतीय वंशाच्या म्हशींनी पहिली तीन बक्षिसे पटकावली.  आपल्या महाराष्ट्रातील पंढरपुरी म्हशीला पहिले बक्षीस मिळाले आहे. विशेष म्हणजे अंतिम फेरीत या म्हशीने भारतीय वंशाच्याच जाफराबादी म्हशीवर विजय मिळवला. तिसरे बक्षीसही भारतीय वंशाच्या व-हाडी (नागपुरी) म्हशीला मिळाले आहे.

अंतिम निकाल:
पंढरपुरी म्हैस (भारत): गोल्ड मेडल
जाफराबादी म्हैस (भारत): सिल्वर मेडल
व-हाडी म्हैस (भारत): ब्रांझ मेडल

अमेरिकेचे प्रेसिडेंट ओबामा यांनी या तीनही म्हशींना लगेच ग्रीन कार्ड देण्याची व्यवस्था करण्याचे आपल्या अधिका-यांना सांगितले आहे. त्यामुळे या तीनही म्हशी भारतात परत येण्याऐवजी अमेरिकेतच रहाणार आहेत. 

या विजयामुळे आता अमेरिकेत भारतीय वंशाच्या माणसांप्रमाणेच भारतीय वंशाच्या म्हशींचीही मागणी वाढणार आहे असे दिसते.

भारताचे क्रीडा मंत्रालाय, परराष्ट्र मंत्रालय यांनी या म्हशींना एन. आर. आय. च्या सर्व सुविधा देण्याचे ठरवण्यासाठी पुढील वर्षी चर्चा करण्याचे ठरवले आहे.  अखिल विदर्भ म्हैस संघटनेने व-हाडी म्हशीचे अभिनंदन केले आहे, तसेच अशी स्पर्धा पश्चिम महाराष्ट्रात झाली असती तर व-हाडी म्हशीला ब्राँझ पदकही मिळाले नसते असे म्हंटले आहे.

(फेक न्यूज सर्व्हिस)